اسلام آباد(مانیٹرنگ ڈیسک) وزیر اعظم نواز شریف کے ترجمان مصدق ملک نے وزیر اعظم میاں نواز شریف کی شنگھائی تعاون تنظیم کے اجلاس میں شرکت کی تصدیق کر دی، تفصیل کے مطابق وزیر اعظم ہاؤس ے جاری کئے گئے بیان میں کہا گیا ہے کہ میاں نواز شریف شنگھائی تعاون تنظیم کے اجلاس میں شرکت کریں گے اور اس حوالے سے حتمی فیصلہ ہو گیا ہے۔ ترجمان وزیر اعظم ہاؤس مصدق ملک کے مطابق شنگھائی تعاون تنظیم کا اجلاس دو نومبر کو کرغیزستان میں ہوگا، واضح رہے کہ پاکستان تحریک انصاف نے 2 نومبر کو اسلام آباد میں دھرنا دینے کا اعلان کیا ہوا ہے۔
دوسری جانب عمران خان نے کہا ہے کہ ہمارے موجودہ قیادت کا کردار ایسا ہے کہ جنہیں دیکھ کر کوئی اسلام قبول نہیں کرے گا۔ اسلام آباد ہائی کورٹ بار ایسوسی ایشن بار سے خطاب کرتے ہوئے عمران خان نے کہا کہ دو قومی نظریہ کے مطابق ہمیں دنیا کی امامت کرنا تھی لیکن میاں نواز شریف نے اتنی لوٹ مار کی ہے ایسے شخص کو دیکھ کر اسلام قبول کون کرے گا؟ انہوں نے کہا کہ یہی حال مولانا فضل الرحمن کا ہے میں آپ عوام سے پوچھتا ہوں کہ کیا مولانا فضل الرحمن کو دیکھ کر کوئی اسلام قبول کرے گا؟ میں جلسہ میں تقریر شروع کرتا ہوں تو پورا جلسہ ڈیزل ڈیزل کے نعرے لگانا شروع ہو جاتا ہے۔