راولپنڈی(این این آئی)عوامی مسلم لیگ کے سربراہ شیخ رشیداحمدنے لال حویلی میں سنی تحریک کے مرکزی رہنمامحمدشاہدغوری سے ملاقات کے دواران گفتگوکرتے ہوئے کہاکہ کرپٹ حکمران قومی مجرم ہیں ہرحال میں سزاملنی چاہیئے ،پانامہ لیکس کی شفاف تحقیقات کا عمل نہ ہونا تشویشناک ہے،اپنے حقوق کے حصول کیلئے قوم کو مفاد پرستوں کے شکنجے سے نکلنا ہو گا،حکومت غیر جمہوری ہتھکنڈوں سے اپوزیشن کی آواز کو دبا نہیں سکتی،کرپشن کے خلاف تحریک سے کسی صورت دستبردارنہیں ہونگے، دونوں رہنماؤں نے ملکی سلامتی، استحکام اورکرپشن کے خلاف مشترکہ جدوجہدکی ضرورت پر اتفاق کیا،محمدشاہدغوری کاکہناتھاکہ محب وطن قوتوں کا اتحاد وقت کی اہم ضرورت ہے، عمران خان سولوفلائیٹ کی بجائے ہم خیال جماعتوں کو ساتھ لیکر چلیں،شیخ رشیداپوزیشن کو متحد کرنے کیلئے پل کا کرداراداکریں، کرپشن کے خاتمے کے بغیر دہشتگردی کے خلاف جنگ کا جیتنا ممکن نہیں،کرپشن کی روک تھام اورقوم کی لوٹی گئی دولت واپس لانے کیلئے پاک فوج کواختیارات دیئے جائیں ،وزیر داخلہ کی کالعدم تنظیموں سے ملاقات نیشنل ایکشن پلان کے منافی ہے، کالعد م تنظیموں کے سربراہوں کے شناختی کارڈ بحال کرنا قابل مذمت ہے، دہشتگردوں سے خوفزدہ ہونے والے نہیں اسلام کی سربلندی اور پاکستان کی سلامتی کیلئے خون کا آخری قطرہ تک بہا دینگے ،اس موقع پرعوامی مسلم لیگ کے رہنما شیخ راشد شفیق ، سنی تحریک کے محمدشاداب رضا نقشبندی، زاہدحبیب قادری، صاحبزادہ عطاء الرحمن دھنیال، مفتی لیاقت علی رضوی، علامہ وسیم عباسی ودیگر بھی موجود تھے۔علاوہ ازیں پاکستان مسلم لیگ نے 2نومبر کو اسلام آباد دھرنا میں شرکت کی تیاریاں شروع کر دی ہیں۔ سینئرمرکزی رہنما و سابق نائب وزیراعظم چودھری پرویزالٰہی کی زیر صدارت اسلام آباد میں ایک اجلاس منعقد ہوا جس میں تمام ضلعی، تحصیل اور یونین کونسل کی تنظیموں کو ہدایت جاری کی گئی کہ وہ اسلام آباد پہنچیں اور دھرنے میں بھرپور شرکت کریں۔ اس سلسلے میں پروگرام کو حتمی شکل دینے کیلئے 27اکتوبر کو مسلم لیگ ہاؤس لاہور میں اجلاس طلب کر لیا گیا ہے جس میں پاکستان مسلم لیگ کے ضلعی عہدیدار، ارکان اسمبلی، ٹکٹ ہولڈر اور دیگر زعما شرکت کریں گے۔ چودھری پرویزالٰہی نے اس سلسلہ میں باہمی رابطے، انتظامات اور پی ٹی آئی کے ساتھ کوآرڈی نیشن کیلئے محمد بشارت راجہ کو مامور کیا ہے۔ اجلاس میں طارق بشیر چیمہ ایم این اے، میجر (ر) طاہر صادق، امتیاز رانجھا اور حافظ عمار یاسر بھی شریک تھے۔