اسلام آباد (مانیٹرنگ ڈیسک) پاکستانی ٹی وی چینلز اور ریڈیوزپربھارتی مواد نشرکرنے پرمکمل پابندی کے فیصلے پر عملدرآمد جمعہ سے شروع ہو گیا جبکہ چیئرمین پیمرا ابصارعالم نے کہا ہے کہ خلاف ورزی کرنے والے چینل اورریڈیوکا لائسنس فوری معطل کردیا جائے گا۔ تفصیلات کے مطابق پیمرا اتھارٹی نے حکومتی جواب کے بعد اکیس اکتوبردن تین بجے کے بعد کسی بھی چینل پربھارتی مواد نشرکرنے پرمکمل پابندی عائد کرنے کا فیصلہ کرتے ہوئے مشرف دورحکومت کی طرف سے انڈیا کودی گئی یکطرفہ رعایت کو منسوخ کردیا تھا جس پر جمعہ سے عمل درآمد شروع ہوگیا ہے۔چیئرمین پیمراابصارعالم نے کہا ہے کہ اب کوئی بھی ٹی وی چینل اور ایف ایم ریڈیو بھارتی مواد نشر نہیں کرسکے گا خلاف ورزی کرنے والے چینل اورریڈیو کیخلاف سخت کارروائی عمل میں لائی جائے گی اور انڈین مواد نشرکرنے والے چینل کا فوری لائسنس معطل کیا جائے گا۔دوسری جانب پیمرا کے فیلڈ انسپکٹرز نے چکوال میں غیر قانونی انڈین ڈی ٹی ایچ کی ایک کھیپ چھاپہ مار کر قبضے میں لے لی۔ چھاپہ مار ٹیم میں فیلڈ انسپکٹر مزمل باجوہ، آصف اقبال، ظہیر احمد، فیصل شبیر، آصف علی اور سٹاف محمد اختر اور محمد نذیر شامل ہیں۔

موضوعات:پیمرا لائسنس معطل