لاہور ( این این آئی)پاکستان عوامی تحریک نے عمران خان کے بیان پر ناراضگی کا اظہار کرتے ہوئے رائیونڈ مارچ میں رسمی طور پر بھی شرکت نہ کرنے کا اعلان کر دیا ۔ ذررائع کے مطابق عوامی تحریک نے رائے ونڈ مارچ میں شمولیت نہ کرنے کے اعلان کے بعد دونوں جماعتوں میں دوریاں بڑھنے لگی ہیں جبکہ عمران خان اور طاہرالقادری کو قریب لانے والے رابطہ کاروں کا مشن بھی ناکام ہوتا نظرآرہا ہے۔ دونوں جماعتوں کے درمیان دوریاں ختم کرنے کے لئے سیاسی رابطہ کارنے کافی کوششیں کیں مگرنتیجہ تحریک انصاف کے حق میں نہ رہا۔ پیر کے روز عمران خان نے کہا تھا کہ عوامی تحریک کے سربراہ پتہ نہیں کیوں ناراض ہیں اور میں کوئی رشتہ مانگنے تو نہیں جا رہے جس کے بعد رابطہ کاربھی اس بیان سے پریشان ہیں اورعوامی تحریک کے کارکنوں میں عمران خان کے بیان پر شدید اشتعال پایا جاتا ہے۔اس حوالے سے عوامی تحریک کے سیکرٹری جنرل خرم نواز گنڈا پورکا کہنا ہے کہ رائے ونڈ مارچ میں علامتی شرکت بھی نہیں ہوگی، عمران خان کے رشتے والے بیان سے ان کی غیرسنجیدگی ظاہرہوتی ہے جبکہ عوامی تحریک نے مارچ میں شرکت کا کوئی وعدہ ہی نہیں کیا تھا۔