اسلام آباد(نیوز ڈیسک) وزیراعظم نواز شریف کا کہنا ہے کہ پیسے دے کر ووٹ خریدنا مکروہ فعل ہے اس لئے ضمیر فروشی کے کاروبار کو روکنے کے لئے سب کو مل کر کام کرنا ہوگا۔وزیراعظم ہاﺅس میں پارلیمانی جماعتوں کے ارکان کا اجلاس منعقد ہوا جس سے خطاب کرتے ہوئے وزیراعظم نواز شریف کا کہنا تھا کہ سینیٹ انتخابات سے قبل ہارس ٹریڈنگ کے خلاف آوازیں اٹھ رہی ہیں اس لئے سب کو مل کر سینیٹ کا تقدس برقرار رکھنا ہوگا اور ضمیر فروشی کے کاروبار کو روکنا ہوگا۔ انہوں نے کہا کہ پیسے دے کر ایوان بالا میں انتہائی افسوسناک ہے، سینیٹ انتخابات میں شفافیت کا انتخابی اصلاحات سے گہرا تعلق ہے اور ہر جماعت کی ذمہ داری بنتی ہے کہ مکروہ فعل روکنے کے لئے مل کر کام کریں۔اجلاس میں اپوزیشن لیڈر سید خورشید شاہ، سابق وزیراعظم راجا پرویز اشرف، وفاقی وزیردفاع خواجہ آصف، وزیرخزانہ اسحاق ڈار، ایم کیو ایم کی جانب سے ڈاکٹر فاروق ستار،بابرغوری اور رشید گوڈیل شریک ہوئے جب کہ دیگر رہنماﺅں میں محمود خان اچکزئی، اعجاز الحق، آفتاب احمد خان شیرپاﺅ، عارف علوی،حاصل بزنجو، اٹارنی جنرل ، وزیراعظم کے آئینی و قانونی ماہرین اور سیاسی مشیروں نے شرکت کی۔اجلاس میں کھل کر سینٹ الیکشن میں ہونے والی ہارس ٹریڈنگ پر گفتگو کی گئی۔ ہارس ٹریڈنگ روکنے کیلئے کی جانےوالی ترامیم کے مسودے پر رہنماوں کو اعتماد میں لیا گیا –