لاہور(آئی این پی)پاکستان ون ڈے ٹیم کے کپتان اظہر علی کے سر سے قیادت کی تلوار عارضی طور پر ہٹ گئی، پاکستان کر کٹ بورڈ نے رضاکارانہ طورپر دستبردار کرانے کی مہم ناکام ہونے پر اظہر علی کو کپتانی سے ہٹانے کے فیصلے کو موخر کیے جانے کا امکان ہے، ویسٹ انڈیز سے سیریز کے بعد معاملے کا از سر نو جائزہ لیا جائے گا۔ تفصیلات کے مطابق انگلینڈ سے ون ڈے سیریز میں شکست پر اظہر علی کے انداز قیادت پر سوال اٹھائے گئے، پی سی بی حکام نے بھی ان کو رضاکارانہ طور پر یہ ذمہ داری چھوڑ کر بطور عام کھلاڑی کھیلنے کی ہدایت دی، بیٹسمین کو خدشہ تھا کہ کپتانی گئی تو ٹیم میں جگہ بھی نہیں بچے گی۔ اس لیے چیئرمین شہریار خان کو آگاہ کیا کہ وہ قیادت نہیں چھوڑیں گے، چند سابق کرکٹرز بھی جلد بازی میں کوئی فیصلہ کرنے کے حق میں نہیں، بورڈ کے سربراہ اسپتال میں ہیں، ہیڈ کوچ مکی آرتھر بھی پاکستان میں موجود نہیں، اس صورتحال میں قوی امکان ہے کہ پی سی بی کی جانب سے سرفراز کو ون ڈے کپتان بنانے کا اعلان نہیں کیا جائے گا، ویسٹ انڈیز سے سیریز کے بعد معاملے کا از سرنو جائزہ لینے کے بعد ہی کوئی فیصلہ ہو گا، دریں اثنا یو اے ای میں کیریبیئنز سے مقابلوں میں انتخاب عالم کی جگہ وسیم باری بطور ٹیم منیجر ذمہ داریاں سنبھالیں گے۔واضح رہے کہ قومی کرکٹ ٹیم کی کپتانی کیلئے اظہر علی کے بعد سرفرا ز احمد اورعماد وسیم کے نام پر غور کیاجارہاہے۔