لاہور/کراچی/اسلام آباد(مانیٹرنگ ڈیسک) پاکستان تحریک انصاف کی لاہور احتجاجی ریلی اور کراچی میں بلاول کے قافلے نے دو معصوموں کی جان لے لی۔
کہیں کنٹینر، کہیں پروٹوکول اور کہیں رکاوٹیں ، معصول شہریوں کی جانوں کا حساب کون دے گا؟ سرکاری حکام، سیاسی قیادت ، جلسوں پروٹوکول اور رکاوٹوں نے ماؤں کی گودیں اجاڑنے کا نہ رکنے والا سلسلہ شروع کر دیا ۔ عمران خان، طاہر القادری اور بلاول بھٹو زرداری کے احتجاجی مظاہروں کے دوران سینکڑوں شہری عذاب میں گرفتار ہو گئے ۔ عام عوام میں شدید غصے کی لہر پھیل گئی ۔ لاہور کے علاقے شاہدرہ میں پی ٹی آئی قافلے کے لئے لگائی جانے والی رکاوٹوں میں پھنس کر شاہدرہ کے علاقے میں شیر خوار بچے کی ایمبولنس کو راستہ نہ ملا جس پر بچہ ایمبولینس میں ہی دم توڑ گیا ۔ جبکہ کراچی میں بلاول کے قافلے کے پروٹوکول میں پھنسی ایک ایمبولینس میں بھی ایک معصوم بچی جان سے ہاتھ دھو بیٹھی۔ ڈاکٹروں کے مطابق اگر وقت پر دونوں بچے ہسپتال پہنچ جاتے تو ان کی جانیں بچائی جا سکتی تھیں ۔اطلاعات کے مطابق رکاوٹوں اور کنٹینروں کے باعث ٹریفک کا اژدھام ہو گیا ہے اور سینکڑوں کی تعداد میں لاہور اور راولپنڈی میں ایمبولینسز پھنسی ہوئی ہیں۔
