نوٹنگھم(نیوزڈیسک)تیسرا ون ڈے، جیت کے خواب دیکھنے والی پاکستانی ٹیم کے ہوش اُڑ گئے،اظہرعلی کا بدترین استقبال،وکٹ کے حصول میں مسلسل ناکامی کے بعد اظہرعلی نے باؤلنگ کرنے کا فیصلہ کیا تو پہلے ہی اوور میں تین چوکوں اور ایک چھکے کی مدد سے بیس رنز جڑ کر انگلش بیٹسمینوں نے پاکستانی کپتان کو حیران و پریشان کرڈالا، تفصیلات کے مطابق ٹرینٹ برج سٹیڈیم میں کھیلے جا رہے تیسرے ون ڈے میچ میں انگلینڈ کے کپتان اوئن مورگن نے پاکستان کیخلاف ٹاس جیت کر پہلے بیٹنگ کرنے کا فیصلہ کیا ہے۔ انگلینڈ کی جانب سے جیسن روئے اور ایلکس ہیلز میدان میں اترے۔ تاہم انگلینڈ کا سکور ابھی 33 رنز تک ہی پہنچا تھا کہ جیسن روئے کیچ آؤٹ ہو کر پویلین لوٹ گئے۔ جیسن روئے نے 15 رنز بنائے۔پانچ میچوں کی سیریز میں انگلینڈ نے ابتدائی دونوں میچ جیت کر اپنی گرفت مضبوط کر لی ہے۔ اگر قومی ٹیم کو سیریز میں واپسی کرنا ہے تو اسے یہ میچ ضرور جیتنا ہوگا۔ ٹاس کے بعد گفتگو کرتے ہوئے قومی ٹیم کے کپتان اظہر علی کا کہنا تھا کہ وکٹ بلے بازی کیلئے بہت سازگار ہے۔ اگر ٹاس جیتتے تو پہلے بیٹنگ کرنے کا ہی فیصلہ کرتے، تاہم کھلاڑی بہتر کارکردگی دکھانے کی کوشش کریں گے۔ انہوں نے بتایا کہ تیسرے میچ میں ایک تبدیلی کرتے ہوئے عماد وسیم کی جگہ محمد نواز کو شامل کیا گیا ہے۔ واضح رہے کہ ساؤتھمپٹن میں کھیلے گئے پہلے ون ڈے میچ میں انگلینڈ نے ڈک ورتھ لوئس فارمولے کے تحت پاکستان کو 44 رنز سے شکست دی تھی۔ جبکہ لارڈز میں کھیلے گئے دوسرے ون ڈے میں انگلینڈ نے پاکستان کو چار وکٹوں سے شکست دیدی تھی۔اب سے کچھ دیر پہلے تک انگلش ٹیم ایک کھلاڑی کے نقصان پر 30اوورز میں 210 رنز بناچکی ہے ،پاکستان کی جانب سے صرف ایک وکٹ حسن علی ہی حاصل کرسکے ہیں۔