اسلام آباد (مانیٹرنگ ڈیسک) فیس بک صارفین کیلئے شاید یہ بات نئی ہو مگر قارئین ہم آپ کو بتاتے چلیں کہ فیس بک نے اپنی ایپ کے نیوزفیڈ پر چوکور کی بجائے ورٹیکل یا عمودی ویڈیوز کو پیش کرنا شروع کردیا ہے۔یعنی اب فیس بک ویڈیوز کو کراپ کرکے چوکور نہیں کررہی ہے اور یہ اپ ڈیٹ اینڈرائیڈ اور آئی او ایس کے لیے کی جارہی ہے۔اس اپ ڈیٹ کے بعد ویڈیو کا سائز 1:1 کی بجائے 2:3 ہوجائے گا۔فیس بک کے ایک ترجمان نے اس تبدیلی کی تصدیق کرتے ہوئے کہا کہ ہم جانتے ہیں کہ لوگ فیس بک پر اس طرح کے تجربات سے زیادہ لطف اندوز ہوتے ہیں، اسی لیے ہم نے نیوز فیڈ پر ورٹیکل ویڈیو کو پیش کرنا شروع کردیا ہے۔اسنیپ چیٹ اور پیری اسکوپ جیسی ایپس کی بدولت بیشتر افراد اس فارمیٹ کی ویڈیوز سے واقف ہیں اور فیس بک کے خیال میں اس طرح کی ویڈیوز 9 گنا زیادہ دیکھی جاتی ہیں۔اگر تو آپ کی ایپ میں یہ تبدیلی نہیں آئی تو فکر مند مت ہو آنے والے چند ہفتوں میں دنیا بھر کے صارفین اس فیچر سے لطف اندوز ہوسکیں گے۔اور ہاں اس طرح کی ویڈیو اسکرین پر اتنی بڑی ضرور ہوگی کہ آپ کو فل اسکرین کرنے کی ضرورت نہیں رہے گی۔