اسلام آباد(مانیٹرنگ ڈیسک)توانائی کے بحران میں گھرے پاکستانیوں کو سیاسی رہنما کئی دہائیوں سے سبز باغ دکھارہے ہیں مگر مسئلہ کسی طور حل ہوتا دکھائی نہیں دیتا، ایسے میں تھائی لینڈ کے دیہاتی ہمارے لئے ایک مثال ثابت ہوسکتے ہیں کہ جنہوں نے ایک انتہائی منفرد ذریعے سے توانائی پیدا کرنا شروع کی اور اب اس میں خود کفیل ہوچکے ہیں۔تھائی لینڈ کا دور دراز دیہات پاڈینگ اس خود کفالت کی شاندار مثال ہے جہاں دیہاتیوں نے جانوروں کے گوبر سے بڑے پیمانے پر توانائی کی پیداوار شروع کردی۔ پاڈینگ کے لوگ اپنے گھروں کے باہر گوبر کی بھاری مقدار کو پلاسٹک کے جہازی سائز تھیلوں میں جمع کرلیتے ہیں۔ تھیلے میں جمع گوبر کی ڈی کمپوزیشن سے قدرتی طور پر میتھین گیس پیدا ہوتی ہے جسے توانائی کے حصول کے لئے استعمال کیا جاتا ہے۔ گاؤں کے ہر گھر میں توانائی کے حصول کا یہ ذریعہ استعمال ہورہا ہے جبکہ شمسی توانائی کا استعمال بھی کیا جارہا ہے۔اس منفرد گاؤں کے ہر گھر نے گوبر اور سولر پینل کے زریعے توانائی کی تمام ضروریات پوری کرلی ہیں اور گاؤں والوں کا کہنا ہے کہ اب انہیں حکومت کے ناز اٹھانے کی کوئی ضرورت نہیں کیونکہ ان کی گیس بھی مفت ہے اور بجلی بھی مفت۔