لاہور(نیوز ڈیسک )پاکستان ٹیم کے ہیڈ کوچ وقار یونس کے پائلٹ بھائی فیصل یونس کی ایف ایس سی اور گریجویشن کی سند جعلی ہونے کا انکشاف ہوا ، پبلک اکانٹس کمیٹی نے تمام ریکارڈ طلب کر لیا۔اپوزیشن لیڈر خورشید شاہ کی زیر صدارت پبلک اکانٹس کمیٹی کے اجلاس میں ایوی ایشن حکام نے بتایا کہ وقار یونس کے بھائی فیصل یونس 2003 ءمیں پی آئی اے میں بھرتی ہوئے ۔ تین سال بعد معلوم ہوا کہ ان کی تعلیمی ا سناد جعلی ہیں ، معاملے کی تحقیقات کرنے والے افسر نے ملازمت سے برطرف نہیں کیا تاہم فیصل یونس کی سنیارٹی میں تین سال کی تنزلی کر دی گئی ، ایوی ایشن حکام کے مطابق فیصل یونس کی تعلیمی اسناد جعلی لیکن پائلٹ کا لائسنس اصلی تھا ، وہ ٹرپل سیون جہاز کے پہلے پائلٹ افسر بھی ہیں ، رکن اسمبلی محمود خان اچکزئی نے کہا وقار یونس کے بھائی کو فوری طور پر برطرف کیا جائے ۔ سیکرٹری سول ایوی ایشن محمد علی گردیزی نے بتایا کہ فیصل یونس کی تربیت پر کافی پیسہ خرچ کر چکے ہیں ، انہیں فوری طور پر برطرف نہیں کر سکتے ، پی اے سی نے فیصل یونس سے متعلق تمام ریکارڈ طلب کر لیا۔