کراچی (آن لائن) نومنتخب وزیر اعلیٰ سندھ سید مراد علی شاہ نے رینجرز کے قیام اور اختیارات میں توسیع کی منظوری دے دی ہے۔تفصیلات کے مطابق وزیر اعلیٰ سندھ سید مراد علی شاہ نے چیف سیکرٹری سندھ ، سیکرٹری داخلہ، مشیر قانون اور سیکرٹری قانون سندھ کو وزیر اعلیٰ ہاؤس طلب کیا جس کے بعد ایک گھنٹے تک رینجرز کے اختیارات میں توسیع کی سمری پر تبادلہ خیال کیا گیا،جس کے بعدوزیر اعلیٰ سندھ نے رینجرز کے سندھ میں 1سال کے قیام اور3 ماہ کے خصوصی اختیارات کی سمری پر دستخط کردیئے وزیر اعلیٰ ہاؤس سندھ کے ترجمان کی جانب سے جاری ہونے والے بیان کے مطابق وزیر اعلیٰ کے دستخط کرنے کے بعد توسیع کی سفارشات کے لیے سمری وفاقی وزارت داخلہ کو ارسال کی جائے گی جس کے بعد وفاقی حکومت کی جانب سے رینجرز کے قیام اور اختیارات میں توسیع کا باقاعدہ نوٹیفکیشن جاری کیا جائے گا۔ ترجمان وزیرا علیٰ ہاؤس نے مزید بتایا کہ وزیر اعلیٰ نے امید ظاہر کی ہے کہ رینجرز پہلے سے جذبے سے سندھ میں قیام امن میں اہم کردار ادا کرے گی۔