فیصل آباد (مانیٹرنگ ڈیسک)آل پاکستان کاٹن پاور لومز ایسوسی ایشن کے چیئر مین رانا اخلاق احمد نے پاکستان سے چین کیلئے براہ راست فضائی پروازیں چلانے کا مطالبہ کیا ہے۔چین سے کامیاب دورے کے بعد وطن واپسی پر انہوں نے کہا کہ پاک چین دوستی اور خاص طور پر سی پیک کے معاہدے کے بعد دونوں ملکوں کے درمیان درآمدی اور برآمدی تاجروں کی آمدورفت بہت بڑھ گئی ہے جبکہ ہمسایہ ملک ہونے کے باوجود ہمیں کئی گھنٹوں کے غیر ضروری سفر کے بعد بذریعہ تھائی لینڈ چین جانا پڑتا ہے۔ انہوں نے کہا کہ فیصل آباد میں بھی چینیوں کی ایک بڑی تعداد موجود ہے جبکہ اس صنعتی اور کاروباری شہر سے بھی لوگوں کا آنا جانا لگا رہتا ہے۔ انہوں نے کہا کہ فیصل آباد چیمبر نے فیصل آباد سے براہ راست بین الاقوامی پروازیں شروع کرانے کے سلسلہ میں بھی اہم اور کلیدی کردار ادا کیا تھا جس کی وجہ سے آج پانچ غیر ملکی کمپنیوں سمیت پی آئی اے بھی فیصل آباد سے براہ راست بین الاقوامی پروازیں چلا رہی ہے۔ برآمدی شہر ہونے کی وجہ سے ان تمام پروازوں کو ان کی ضروریات کے مطابق مسافروں کا لوڈ مل رہا ہے۔ انہوں نے کہا کہ چین جانے والوں کی سہولت کیلئے ان فضائی کمپنیوں کو اب براہ راست فیصل آباد سے چین کیلئے پرواز شروع کرنی چاہیں ۔ اس سے جہاں مقامی تاجروں کو آنے جانے کی سہولت ہوگی وہاں ان کے وقت کی بھی بچت ہوگی۔ انہوں نے مزید کہا کہ تھائی لینڈ کے راستے آنے جانے سے تقریباً دوگنا وقت لگتا ہے جبکہ براہ راست پرواز سے اس سے آدھے وقت میں چین جایا جا سکتا ہے