اسلام آباد(خصوصی رپورٹ) سابق وزیر اعلیٰ سندھ سائیں قائم علی شاہ جو اپنی دلچسپ حرکتوں اور جملوں کی وجہ سے اکثر خبروں کی زینت بنے رہتے ہیں ۔۔جاتے جاتے بھی انوکھا کارنامہ سر انجام دے گئے۔ تفصیل کے مطابق سائیں قائم علی شاہ نے گورنر سندھ کو اپنا جو استعفیٰ پیش کیا اس پر 27 جولائی سنہ 201 ء کی تاریخ در کر دی جسے گورنر سندھ عشرت العباد نے منظور بھی کر لیا۔ قائم علی شاہ کی جانب سے استعفیٰ پر لکھی گئی تاریخ کے مطابق یہ پچھلی تاریخوں کا استعفیٰ ہے اور تاریخ دانوں کے مطابق استعفے پر لکھی ہوئی تاریخ کو مد نظر رکھا جائے تو ان دنوں رومن سلطنت میں خانہ جنگی ہو رہی تھی اور ہندوستان پر گپت خاندان کا دور آنے میں چالیس سال باقی تھے۔
واضح رہے کہ بزرگ سیاستدان سائیں قائم علی شاہ سب سے طویل عمر وزیر اعلیٰ کا اعزاز بھی اپنے پاس رکھتے ہیں اور ان کی اسی طویل العمری کی وجہ سے اکثر ان کے بارے میں کشت و زعفران پر مبنی بیانات اور سوشل میڈیا پوسٹیں دیکھنے کو ملتی ہیں۔ ذرائع کے مطابق پارٹی قیادت کے فیصلے کے بعد قائم علی شاہ نامزد وزیر اعلیٰ مراد علی شاہ کے ساتھ گورنر ہاؤس پہنچے اور ڈاکٹر عشرت العباد کو اپنا استعفیٰ پیش کیا۔ گورنر سندھ نے ان کاپچھلی تاریخوں میں دیا گیا استعفیٰ منظور کر لیا۔