لاہور (آن لائن)اسلام پورہ پارک جی ٹی روڈ پر واقع جعلی ادویات بنانے والی فیکٹری پکڑی گئی۔ وزیراعلیٰ ٹاسک فورس برائے انسداد جعلی ادویات کی چھاپہ مار ٹیم نے فیکٹری کو سربمہر کردیا۔ تفصیلات کے مطابق گزشتہ روز وزیراعلیٰ ٹاسک فورس برائے انسداد جعلی ادویات کی چھاپہ مار ٹیم نے پارلیمانی سیکرٹری برائے صحت خواجہ عمران نذیر کی قیادت میں کارروائی کرتے ہوئے مشتاق نامی شخص کو موقع سے پکڑلیا۔ مشتاق گھر میں جعلی ادویات کی تیاری کا دھندہ کرتا تھا۔ چھاپہ مار ٹیم میں ڈپٹی ڈرگ کنٹرولر شوکت وہاب، عمامہ حسین، رانا شاہد، عمران سرفراز، رحیم خاں شامل تھے۔