اسلام آباد(مانیٹرنگ ڈیسک) نجی ٹی وی پروگرام میں گفتگو کرتے ہوئے جمعیت علمائے اسلام (ف) کے سربراہ مولانا فضل الرحمن اینکر پرسن پر برس پڑے۔ تفصیل کے مطابق نجی ٹی وی پروگرام میں جب مولانا فضل الرحمن سے اینکر پرسن نے سوال کیا کہ آپ کشمیر کمیٹی کے چیئرمین ہیں اور آپ کا عہدہ وفاقی وزیر کے برابر ہے۔ آپ پر اتنی زیادہ تنقید کی جا رہی ہے کہ آپ کی کمیٹی مذمتی بیانات سے آ گے نہیں جاتی اس کی کیا وجہ ہے؟ آپ نے کبھی ان لوگوں سے رجوع کیا جو کشمیر کے معاملے میں بہت ایکٹو ہیں؟ تو مولانا فضل الرحمن نے جواب دیا کہ آپ ایک مہربانی کریں، آپ جب کمیٹی کی بات کرتے ہیں تو ایسے کرتے ہیں جیسے میں ملک کا وزیر اعظم ہوں، آئی ایس آئی اور وزارت خارجہ میرے ہاتھ میں ہے۔
مولانا فضل الرحمن سے جب اینکر پرسن مہر بخاری نے جب دوران گفتگو سوال کیا تو مولانا فضل الرحمن نے جواب دیا کہ ’’میری بات تو سنو یار!! میری بات تو سنو‘‘ جس پر مہر بخاری نے کہا کہ میں تو صرف سوال کر رہی ہوں تو مولانا فضل الرحمن نے جواب دیا کہ آپ سوال نہیں کر رہی ہیں بلکہ آپ اپنی ہی باتیں کئے جا رہی ہیں اور اپنی باتیں ہمارے منہ میں ڈالنے کی کوششیں کر رہی ہیں۔آپ مجھ سے سوال نہیں کر رہی بلکہ مجھے تنگ کر رہی ہیں۔ مجھے تنگ نہ کریں۔ مولانا فضل الرحمن نے کہا کہ کشمیر کمیٹی کی حدود کو سمجھیں ، کشمیر کمیٹی کا کام صرف تجاویز دینا ہے اور مشیر کے طور پر کام کرنا ہے۔

موضوعات:اینکر پرسن مولانا فضل الرحمن