اسلام آباد (مانیٹرنگ ڈیسک)موبائل پاس ہو اور اس سے تصویریں نہ بنائی جائیں ، ایسا ہو نہیں سکتا ۔ موبائل جب سے عوام الناس میں مقبول ہوئے تبھی سے تصویریں اور اس کے بعد سیلفیاں لوگوں میں مقبول سے مقبول تر ہوتی گئیں مگر ماہرین کی تازہ ترین تحقیق کے مطابق سیلفی لینے کی عادت چہرے پر نوجوانی میں جھریاں پڑنے کا باعث بن سکتی ہے۔ یہ انتباہ گزشتہ دنوں لندن میں ہونے والی ایک کانفرنس میں سامنے آیا جس میں طبی ماہرین کا کہنا تھا کہ چہرے کو اکثر سمارٹ فون سے خارج ہونے والی روشنی اور الیکٹرو میگنیٹک ریڈی ایشن کی زد میں رکھنا جلد کو نقصان پہنچا تا ہے۔
ماہرین کے مطابق جو لوگ بہت زیادہ سیلفیاں لینے کے عادی ہیں ان کیلئے یہ امر فکرمندی کا باعث ہونا چاہئیے کیونکہ اسکرین سے خارج ہونے والی نیلی روشنی جلد کو نقصان پہنچاتی ہے۔انہوں نے بتایا کہ موجودہ عہد میں لوگ بہت زیادہ سیلفیاں لے رہے ہیں اور آپ غور کریں تو ان کے چہروں پر جھریوں کے آثار کو بھی دیکھا جاسکتا ہے۔ماہرین کا کہنا تھا فون سے خارج ہونے والی مقناطیسی لہریں جلد میں موجود منرلز کو نقصان پہنچاتی ہیں اور ڈی این اے کو ہونے والا نقصان جھریوں کا باعث بنتا ہے۔