کراچی(مانیٹرنگ ڈیسک) گورنر سندھ ڈاکٹر عشرت العباد خان نے کہا ہے کہ میں نے ایم کیو ایم نہیں چھوڑی، انہوں نے مجھے چھوڑ دیا۔ یہ بات انہوں نے عیدالفطر کی نماز کی ادائیگی کے بعد میڈیا سے گفتگو کرتے ہوئے کہی۔ گورنر سندھ نے عید کے بعد تبدیلی کی اطلاعات کے سوال پر کہ عید کے بعد کیا ہوگا۔ گورنر سندھ نے جواب دیا کہ عید کے بعد بکرا عید ہوگی۔ ایک سوال پر ہر معاملہ میں حکومت اور ایم کیو ایم کے درمیان آپ رابطہ کار کا کردار ادا کرتے تھے اب کافی عرصے سے خاموش ہیں کیا آپ نے ایم کیو ایم چھوڑ دی ہے تو انہوں نے کہا کہ میں نے ایم کیو ایم نہیں چھوڑی بلکہ انہوں نے چھوڑ دیا ہے۔ انہوں نے کہا کہ ضرب عضب کامیابی سے جاری ہے۔ قانون نافذ کرنے والے اداروں اور دیگر ایجنسیز کی دہشت گردی کے خلاف بہتر کارروائی اور عوام کے تعاون سے سندھ خصوصاً کراچی میں امن قائم ہوا ہے۔ آج لوگ پرامن طریقے سے عید منا رہے ہیں۔ انہوں نے کہا کہ امجد صابری کی شہادت کا واقعہ بہت افسوسناک ہے۔ وہ ملک وقوم کا اثاثہ تھے۔ ان کے قتل کی تفتیش صحیح سمت میں جاری ہے۔ بہت جلد اس حوالے سے اچھی خبر ملے گی۔ واضح رہے کہ گورنر سندھ نے عید کی نماز پولو گراؤنڈ میں ادا کی۔ ان کے ہمراہ چیف سیکریٹری سندھ صدیق میمن، کمشنر کراچی اعجاز احمد خان، ایڈمنسٹریٹر کراچی بلدیہ عظمیٰ لئیق احمد خان، مختلف ممالک کے سفارتکاروں، اعلیٰ سول حکام، معززین شہر اور عوام کی بڑی تعداد نے نماز عید ادا کی۔ بعد ازاں صدر مملکت ممنون حسین اور وزیراعلیٰ سندھ سید قائم علی شاہ نے فون پر گورنر سندھ کو عید کی مبارکباد دی۔