اسلام آباد(مانیٹرنگ ڈیسک) آسکر ایوارڈ یافتہ میوزک کمپوزر اے آر رحمان نے کہا ہے کہ امجد صابر ی کے قتل پر خاموشی سب سے بہتر ہے ٗ ہمیں اس بارے بات کرنی بند کر دینی چاہیے ۔ایک انٹرویو دیتے ہوئے اے آر رحمان نے کہاکہ خاموشی سب سے بہتر ہے اور ہمیں اس بارے میں بات کرنی بند کردینی چاہیے۔انہوں نے کہاکہ لوگ جتنا اس بارے میں بات کریں گے اتنا ہی اسے بڑھاوا ملے گااس سے لوگوں میں مزید اشتعال بڑھے گا اور غصہ بیوقوفی کی ایک شاخ ہے۔انہوں نے کہاکہ اس وقت دنیا بھر میں جو کچھ ہورہا ہے آپ اسے تبدیل نہیں کرسکتے ٗآپ کو لوگوں کو خوش رکھنے کی کوشش کرنی چاہیے اور وہی کام کریں جو آپ کرتے ہیں ٗ خود کو تبدیل کریں ٗدنیا خود بخود تبدیل ہوجائیگی۔واضح رہے کہ معروف قوال امجد صابری کو گزشتہ ماہ 22 جون کو نامعلوم افراد نے کراچی کے علاقے لیاقت آباد میں گولیوں کا نشانہ بنایا تھا جس کے نتیجے میں وہ موقع پر ہی جاں بحق ہوگئے تھے۔