کوئٹہ (مانیٹرنگ ڈیسک)عالمی بنک نے بلوچستان کے زرعی علاقوں میں پانی کی فراہمی کو بہتر بنانے کے لئے 20کروڑ ڈالر آسان قرضے کی منظوری دے دی ہے۔ یہ قرض 25سال کے لئے ہوگا۔ واضح رہے کہ وزیراعلیٰ بلوچستان نواب ثناء اللہ خان زہری نے کچھ عرصہ قبل کراچی میں عالمی بنک کے صدر سے ملاقات کی تھی اور انہیں بلوچستان میں پانی کی تشویشناک صورتحال سے آگاہ کیا تھا۔ اسی ضمن میں عالمی بنک نے بلوچستان میں آبپاشی کے نظام اور کسانوں کی حالت بہتر بنانے کے لئے 20کروڑ ڈالر قرض آسان شرائط پر فراہم کرنے کی منظوری دی ہے۔ ماہرین کا خیال ہے کہ اس خطیر رقم سے بلوچستان میں ڈیمز تیار کرنے اور آبی ذخائر کی صورتحال کو بہتر بنانے میں خاطر خواہ مدد ملے گی۔ موجودہ صوبائی حکومت صوبے کے اہم مسائل جن میں پانی کی کمی کا سنگین مسئلہ بھی شامل ہے کے حل کے لئے بتدریج اہمپیشرفت کررہی ہے۔ عالمی بنک سمیت دیگر بین الاقوامی مالیاتی اور ڈونرز اداروں سے معاونت کے حصول کے ذریعہ بلوچستان کے پیداواری شعبوں کی ترقی سے صوبے میں ترقی کے ایک روشن باب کا آغاز ہوگا اور عوام نے حکومت سے جو امیدیں اور توقعات وابستہ کررکھی ہیں وہ پوری ہونے کی قوی امید ہے جس کا تمام تر کریڈٹ وزیراعلیٰ نواب ثناء اللہ خان زہری اور ان کی اتحادی جماعتوں کو جاتا ہے جبکہ عالمی بنک کے ایگزیکٹیو ڈائریکٹر ناصر محمود کھوسہ کا اس معاملے میں کردار قابل ستائش ہے۔