کراچی(نیوز ڈیسک)سپریم کورٹ کے سابق جسٹس رانا بھگوان داس 73سال کی عمر میں انتقال کرگئے،صدرمملکت ممنون حسین ،وزیراعظم نوازشریف ،تحریک انصاف کے چیئرمین عمران خان ، سابق صدر آصف زرداری سمیت سیاسی وسماجی قائدین نے دکھ اور افسوس کا اظہار کیا ۔20 دسمبر 1942 کو نصیر آباد میں پیدا ہونے والے رانا بھگوان داس نے قانون اور اسلامی علوم میں ماسٹر کیا تھا۔1965 میں انہوں نے وکالت کا باقاعدہ آغاز کیا۔ جس کے بعد وہ سیشن جج مقرر ہوئے۔ 1994 سے 1999 تک وہ ہائی کورٹ کے جج کی حیثیت سے خدمات انجام دیں۔ 2000 میں وہ سپریم کورٹ کے جج مقرر ہوئے۔ 2007 اور 2008 میں انہوں نے قائم چیف جسٹس کی حیثیت سے خدمات بھی سرانجام دیں۔بھگوان داس کی سربراہی میں سپریم کورٹ کے بنچ نے سابق چیف جسٹس افتخار چوہدری کے خلاف دائر ریفرنس خارج کرتے ہوئے انہیں بحال کیا تھا۔ سپریم کورٹ سے ریٹائرمنٹ کے بعد حکومت نے انہیں 3 برس کے لئے چیئرمین فیڈرل پبلک سروس کمیشن مقرر کیا تھا۔ انہیں چیئرمین نیب کی بھی پیشکش کی گئی تھی تاہم انہوں نے اسے قبول کرنے سے معذرت کرلی تھی۔ رانا بھگوان داس گزشتہ کچھ عرصے سے علیل تھے اور مقامی نجی ہسپتال میں زیر علاج تھے جہاں وہ انتقال کرگئے۔