اسلام آباد(مانیٹرنگ ڈیسک) سینئر تجزیہ نگار نجم سیٹھی نے امجد صابری قتل بارے نجی ٹی وی پروگرام میں اہم انکشافات کر دیئے۔ نجم سیٹھی نے گفتگو کرتے ہوئے کہا کہ اطلاعات کے مطابق امجد صابری کو ایک دعوت آئی کہ امریکہ میں آپ نے ایک کنسرٹ کرنا ہے، امجد صابری ایک پروفیشنل آدمی تھے انہوں نے کہا کہ ٹھیک ہے میں کنسرٹ کرنے کیلئے تیار ہوں مجھے کتنے پیسے دیئے جائیں گے؟ کنسرٹ کے معاملات طے ہو گئے ۔امجد صابری کو بتایا گیا کہ کنسرٹ فنڈ ریزنگ ہوگا اور اس میں جو پیسے اکٹھے ہوں گے وہ پاک سرزمین پارٹی کو جائیں گے۔ امجد صابری کو کسی نے بتایا کہ یہ کنسرٹ پاک سرزمین پارٹی کے لوگ کروا رہے ہیں اس لئے آپ اس میں نہ جائیں یہ سیاسی پروگرام بن جائیگا، امجد صابری نے تجویز کو مسترد کر دیا اور کہا کہ میں پروفیشنل آدمی ہوں مجھے جو بھی بلائے گا میں چلا جاؤں گا ، میں نے تو پیسے لینے ہیں اور پرفارم کرنا ہے۔
نجم سیٹھی نے کہا کہ اس کنسرٹ میں 10 لاکھ ڈالر جمع ہوئے جو ذرائع کے مطابق پاک سرزمین پارٹی کو گئے۔ اس بات پر کچھ لوگ امجد صابری سے ناراض تھے۔ انہوں نے امجد صابری کو دھمکیاں بھی دیں۔ اس زاویے سے سیکورٹی ادارے اور رینجرز سوچ رہے ہیں کہ وہ لوگ جنہوں نے امجد صابری کو وارننگ دی تھی کہ اس کنسرٹ میں نہ جائیں ان کی بھی تحقیقات ہونی چاہئیں ۔ ایم کیو ایم کی طرف سے یہ خیال کیا جاتا رہاکہ امجد صابری کا جھکاؤ پاک سرزمین پارٹی کی طرف جاتا رہا ہے جبکہ امجد صابری سیاسی پارٹیوں سے حتی الامکان دور رہنے کی کوشش کرتے تھے۔