اسلام آباد(مانیٹرنگ ڈیسک)ہیکرز نے معروف سرچ انجن اور انٹرنیٹ کی دنیا کی بڑی کمپنی گوگل کے سی ای او کو چونا لگا دیا۔ گوگل کے سی ای او سندر پچائی کے کیورا اکاؤنٹ کو گزشتہ شب ہیک کرلیا گیا اور اس طرح وہ ان مشہور شخصیات کا حصہ بن گئے جن کے سوشل میڈیا اکاؤنٹس کو ایک گروپ ‘اورمائن’ ہیک کررہا ہے۔گزشتہ ایک مہینے کے دوران یہ گروپ فیس بک کے بانی مارک زکربرگ سمیت دیگر افراد کے اکاؤنٹس ہیک کرچکا ہے۔
سندر پچائی کے اکاؤنٹ کا ہیک ہونا اس وقت منظرعام پر آیا جب کیورا اکاؤنٹ پر کی جانے والی پوسٹس گوگل کے سی ای او کے ٹوئٹر اکاؤنٹ پر بھی پوسٹ ہوئیں جس کی وجہ دونوں اکاؤنٹس کا لنک ہونا تھا۔تاہم ہیکرز کو سندر پچائی کے ٹوئٹر اکاؤنٹ تک پوری رسائی حاصل نہیں ہوسکی اور وہ ہیک ہونے سے بچ گیا تاہم وہ اپنا پیغام لاکھوں افراد تک پہنچانے میں ضرور کامیاب ہوگئے۔اس گروپ نے اپنے ایک بیان میں کہا ہے کہ مارک زکربرگ کے مقابلے میں جن کے سوشل میڈیا اکاؤنٹس کولنکڈان کے لیک ڈیٹا کی مدد سے ہیک کیا گیا تھا اور معلوم ہوا تھا کہ ان کا پاس ورڈ بھی بہت آسان تھا، جبکہ گوگل کے سی ای او کے لیے ہیکرز نے کیورا میں موجود ایک کمزوری کو استعمال کیا۔