لاہور(این این آئی )صوبائی وزیر آبپاشی وچیئرمین پیڈا میاں یاور زمان نے کہا ہے کہ آبی گزر گاہوں میں جہاز رانی کے منصوبہ پر ترقیاتی کام مکمل کرلئے گئے ہیں،دریائے سندھ میں داودخیل تا اٹک شروع کئے جانے والے اس منصوبے سے عوام رواں سال ہی استفادہ کر سکیں گے۔یہ بات انہوں نے اپنے دفتر میں ممبران صوبائی اسمبلی کے وفد سے گفتگو کرتے ہوئے کہی ۔ اس موقع پر ان لینڈ واٹر ویز ٹرانسپورٹ ڈویلپمنٹ کمپنی ، محکمہ آبپاشی اور پیڈا کے افسران بھی موجود تھے۔صوبائی وزیر آبپاشی نے اپنی گفتگو کے دوران بتایا کہ آبی گزر گاہوں میں جہاز رانی کے منصوبہ پر ترقیاتی سرگرمیاں مکمل کر لی گئی ہیں۔ اس سلسلے میں پائلٹ پراجیکٹ کے تحت دادو خیل تا اٹک سروس کے آغاز کے لئے آبی جہاز پانی میں اتار دیا گیا ہے جبکہ جہاز رانی کے شعبہ کے ماہرین سیفٹی کے پہلوؤں کا جائزہ لے رہے ہیں تاکہ باقاعدہ سروس کے آغاز سے پہلے ضروری اقدامات کر لئے جائیں۔انہوں نے کہا کہ مذکورہ منصوبے کی بدولت عوام الناس کو سستی سفری سہولت میسر آئے گی۔ صوبائی وزیر میاں یاور زمان نے اپنی گفتگو کے دوران اس عزم کا اظہار کیا کہ پنجاب کے واٹر سیکٹر کوبھرپور وسائل فراہم کئے جائیں گے تا کہ صوبہ بھر کی آبی گزر گاہوں میں جہازرانی کو فروغ دیا جا سکے۔