واشنگٹن(آئی این پی) امریکی صدر باراک اوباما نے برطانوی ووٹرز کے یورپی یونین سے اخراج کے فیصلے پر کہا ہے کہ امریکا برطانوی عوام کے فیصلے کا احترام کرتا ہے،برطانیہ اور امریکا آئندہ بھی ایک دوسرے سے خصوصی طور پر جڑے رہیں گے۔غیر ملکی میڈیا کے مطابق وائٹ ہاؤس کی طرف سے جاری کردہ ایک بیان میں اوباما نے کہا کہ امریکا برطانوی عوام کے فیصلے کا احترام کرتا ہے۔ اوباما نے کہا کہ مغربی دفاعی اتحاد نیٹو کے رکن ملک کے طور پر برطانیہ کو امریکا کی خارجہ، سلامتی اور اقتصادی پالیسیوں میں مرکزی اہمیت حاصل رہے گی۔ اوباما کے مطابق استحکام، جمہوریت اور اقتصادی ترقی کے لیے بے پناہ خدمات انجام دینے والی یورپی یونین بھی امریکا کے لیے بدستور بے پناہ اہمیت کی حامل ہے۔