ممبئی  بالی ووڈ کی دنیا میں شہرت کی بلندیوں کو چھونے والی شاہ رخ خان اور کاجول کی سپر ہٹ فلم ’’دل والے دلہنیا لے جائیں گے‘‘ کو مسلسل 20 سال تک سینما گھر کی زینت بنے رہنے کےبعد ہٹا لیا گیا ہے۔ 90 کی دہائی میں پردے پر آنے والی شاہ رخ خان اور کاجول کی فلم’’ دل والے دلہنیا لے جائیں گے‘‘ کو ممبئی کے مشہور سینما مراٹھا مندر میں مسلسل ایک ہزار 9 ہفتے تک دکھایا گیا، 20 سال قبل یش راج فلمز کمپنی کے تحت ریلیز ہونے والی یہ فلم بالی ووڈ کی کامیاب ترین فلموں میں سے ایک ہے جو ایک محبت کی کہانی پر مشتمل ہے، اس فلم نے نہ صرف دنیا بھر میں بے انتہا شہرت حاصل کی، بزنس کے حوالے سے بھی یہ فلم نہ صرف انتہائی کامیاب رہی بلکہ اس نے متعدد ایوارڈز بھی حاصل کیے۔ بالی ووڈ کی اس کامیاب ترین فلم نے 10 فلم فیئر ایوارڈ سمیت بہترین اداکار،اداکارہ اور ہدایت کار کا ایوارڈ بھی حاصل کیا جبکہ اس نے شاہ رخ اور کاجول کی جوڑی کو مقبولیت کی انتہا پر بھی پہنچادیا۔ بھارتی میڈیا کے مطابق مراٹھا مندر کے مینیجنگ ڈائریکٹر منوج دیسائی نے فلم کو ہٹانے کی وجوہات بتاتے ہوئے کہا کہ پہلے اس فلم کو دیکھنے کے لئے شہر سے باہر سے بھی شائقین بڑی تعداد میں آتے تھے تاہم اب ناظرین کی تعداد بہت کم ہوگئی ہے اور ایک شو میں 1100 کے مقابلے میں بہ مشکل 100 سے 200 افراد آتے ہیں اس لئے انہوں نے اس فلم کو ہٹا کر کسی دوسرے فلم کو لگانے کا فیصلہ کیا ہے۔