پشاور(آن لائن) پشاور کے نواحی علاقے متھرااسلم ڈھیری میں یکے بعد دیگرے دو ریمورٹ کنٹرول بم دھماکوں میں ایک پولیس اہلکار شہید جبکہ پولیس اہلکاروں سمیت 15 افراد زخمی ہو گئے،ہلاکتوں میں اضافے کا خدشہ ظاہر کیا جارہا ہے۔ تفصیلات کے مطابق بدھ کے روز پشاور کے علاقے متھرااسلم ڈھیری میں پہلا دھماکا آئی ای ڈی کے ذریعے پولیس موبائل کے قریب کیا گیا جس میں کئی پولیس اہلکار زخمی ہوئے،واقع کے اطلاع ملنے پر پولیس،بم ڈسپوز اسکواڈاور ریسکیو ٹیمیں جائے وقوعہ پر پہنچے ہی تھے کہ ایک اور دھماکا ہو گیا۔پولیس حکام کے مطابق نامعلوم افراد نے پروفیسر ڈاکٹر اکبر نامی شخص کے گھر کے قریب بارودی مواد نصب کیا ہوا تھا، انسداد پولیو ٹیم جیسے ہی اس جگہ پہنچی دھماکہ ہو گیا۔ذرائع کے مطابق ابتداء تحقیقات سے پتہ چلا ہے کہ دہشت گردوں کا ٹارگٹ انسداد پولیو ٹیم تھی ، دھماکے کے بعد پولیس اور بم ڈسپوزل یونٹ کا عملہ موقع پر پہنچ گیا، بی ڈی یو ابھی جائے وقوعہ کا معائنہ ہی کر رہا تھا کہ دوسرا دھماکہ ہو گیا جس میں پولیس اہلکاروں سمیت 8 افراد زخمی ہو گئے،جبکہ ایک زخمی پولیس اہلکار زخموں کی تاب نہ لاتے ہوئے دم توڑ گیا۔ ریسکیو حکام کے مطابق 6 پولیس اہلکاروں سمیت 15 افراد کو لیڈی ریڈنگ اسپتال منتقل کیا گیا جن میں سے ایک پولیس اہلکار دم توڑ گیا ہے، جبکہ دیگر زخمیوں کو طبی امداد دی جا رہی ہے، دھماکے سے زخمی ہونے والوں میں نجی ٹی وی کا ایک کیمرہ مین بھی شامل ہے ۔ پولیس نے علاقے کا محاصرہ کر کے سرچ آپریشن شروع کردیا ہے، تاہم کوئی گرفتاری عمل میں نہیں لائی جا سکی، زخمیوں میں ایک ایدھی اہلکار بھی شامل ہے۔