راولپنڈی (نیوزڈیسک) چیف آف آرمی سٹاف جنرل راحیل شریف اور اردن کے شاہ عبد اللہ ثانی نے دونوں ممالک کے درمیان دفاع اور سیکیورٹی کے شعبے میں تعاون اور مشرق وسطیٰ کی صورتحال پر تبادلہ خیال کیا جبکہ شاہ عبد اللہ نے پاک فوج کی دہشتگردی کیخلاف جنگ میں کامیابیوں اور علاقائی امن اور استحکام کے فروغ کیلئے کوششوں کو سراہا ۔آئی ایس پی آر کے مطابق اردن کے سرکاری دورے پر موجود چیف آف آرمی سٹاف جنرل راحیل شریف نے منگل کو اردن کے شاہ عبد اللہ ثانی سے شاہی محل میں ملاقات کی ۔ ملاقات کے دوران دفاع اور سیکیورٹی کے شعبے میں تعاون ، مشرق وسطیٰ کی علاقائی سیکیورٹی صورتحال سمیت باہمی دلچسپی کے امور زیر غور لائے گئے ۔ ملاقات کے دوران دونوں رہنماؤں نے اتفاق کیا کہ پاکستان اور اردن دوستانہ تعلقات اور بھائی چارے کے جذبے کی عظیم تاریخ رکھتے ہیں جو پائیدار شراکت داری میں منتقل ہو رہی ہے شاہ عبد اللہ ثانی نے پاک فوج کی دہشتگردی کیخلاف جنگ میں کامیابیوں اور علاقائی امن اور استحکام کے فروغ کیلئے کوششوں کو سراہا ۔