اسلام آباد (نیوز ڈیسک) سالانہ 50 لاکھ ڈالر یا اپنی مجموعی فروخت کا 50 فیصد حصہ برآمد کرنےوالے ادارے لانگ ٹرم فنانس فسیلیٹی(ایل ٹی ایف ایف) سے استفادہ کرسکیں گے۔ سٹیٹ بینک آف پاکستان نے ایک بیان میں کہا ہے کہ لانگ ٹرم فنانسنگ کی سہولت ملکی برآمدات کے فروغ میں معاون ثابت ہوگی اور سالانہ پانچ ملین ڈالر یا اپنی مجموعی فروخت کا پچاس فیصد حصہ برآمد کرنے والے مقامی ادارے/ صنعتیں اس سہولت سے استفادہ کرسکیں گے اور انہیں قرضے کی سہولت دس سال کےلئے فراہم کی جائےگی جس میں دو سال کا رعایتی عرصہ بھی شامل ہوگا۔سٹیٹ بینک نے کہا کہ ایسے ادارے تین ‘ پانچ ‘دس سال کی مختلف مدتوں کےلئے یہ سہولت حاصل کرسکیں گے اور قرضے کی اس سہولت پر شرح سود 6فیصد جبکہ ٹیکسٹائل سے منسلک اداروں کےلئے فیصد سالانہ ہوگی۔ اقتصادی ماہرین نے کہا ہے کہ برآمدات سے منسلک ادارے کم شرح سود پر قرضوں کے حصول سے اپنی برآمدات کو بڑھا سکیں گے جس سے نہ صرف ملکی معیشت کے استحکام بلکہ روزگار کے نئے مواقع پیدا کرنے میں بھی مدد حاصل ہوگی۔