موہالی (نیوز ڈیسک) پاکستانی ٹیم کی مسلسل شکستوں نے کوچ وقار یونس کو برہم کر دیا، انھوں نے اپنا سارا غصہ عمر اکمل پر نکالتے ہوئے کہاکہ جو لوگ ٹاپ آرڈر میں بیٹنگ کیلیے شکایتیں کرتے ہیں آج انھوں نے کیا کیا؟ انھیں کچھ کر دکھانے کا پورا موقع ملا تھا،وقار یونس نے کہا کہ ٹی ٹوئنٹی میں موقع کی مناسبت سے کھیلا جاتا ہے۔ اس میں کسی کا نمبر طے نہیں کر سکتے، واضح رہے کہ بھارت کیخلاف میچ سے قبل عمر اکمل نے سابق کپتان عمران خان سے شکایت کی تھی کہ انھیں ابتدائی نمبرز پر نہیں کھلایا جا رہا۔ وقار یونس نے کہا کہ امید پر دنیا قائم ہے، ہم نے بھی سیمی فائنل میں رسائی کی آس لگا لی مگر امکان بہت کم ہے۔دریں اثنا کپتان شاہد خان آفریدی نے کہاکہ ہم باربار پرانی غلطیاں دہرا رہے ہیں، ہرمیچ میں ہم سے غلطیاں ہورہی ہیں ، اب یہ شکست بھول کر آسٹریلیا کیخلاف شیڈول میچ پر توجہ مرکوز کرنا ہوگی، واضح رہے کہ پاکستان ٹیم موہالی ہی میں جمعے کو آخری لیگ میچ کینگروز سے کھیلے گی،آفریدی نے کہا کہ ہمارے بولرز نے اننگز کے درمیان میں اچھا پرفارم کیا۔ اس کے بعد میچ کے 6 ابتدائی اوورز میں عمدہ بیٹنگ کی گئی لیکن اس کے بعد ہم ایسا نہیں کرپائے، ہم اس مرحلے پر باآسانی 6 کی اوسط سے رنز بناسکتے تھے لیکن ایسا نہیں ہوسکا، ہم نے ہر گیند پر اسٹروک کھیلنے اور باؤنڈری لگانا چاہی،اس میں ہم بہت سی گیندوں پر کوئی رنز نہیں بن پائے۔