اسلام آباد(نیوز ڈیسک)قومی احتساب بیورو کے چیئرمین قمر زمان چوہدری نے کہا ہے کہ بحیثیت چیئرمین ان پر کوئی دبائو نہیں نہ سیاسی اور نہ ہی غیر سیاسی 40 برس سے سرکاری ملازمت میں ہوں یار دوست ضرور فون کرتے ہیں مگر آج تک کسی نے کسی مجرم کو چھوڑنے کےلئے مجبور نہیں کیا۔ نیب میں آنے والی کوئی شکایت بھی سرد خانے کی زینت نہیں بنتی دو ماہ کے اندر اندر ہر ڈائریکٹر جنرل آنے والی درخواستوں پر یہ فیصلہ کرنا ہوتا ہے کہ وہ قانونی کارروائی کرنے کے قابل ہے یا نہیں۔ اخبار نویسوں کے ایک گروپ سے غیر رسمی گفتگو کرتے ہوئے قمر زمان چوہدری نے کہاکہ کسی بھی کیس کا ریفرنس دائر کئے جانے تک دس ماہ صرف ہوتے ہیں دو ماہ میں جانچ پڑتال کی جاتی ہے چار ماہ میں انکوائری اور چار ماہ میں تفتیش مکمل کرکے ریفرنس عدالت میں پیش کردیا جاتا ہے ۔جنگ رپورٹر ایوب ناصر کے مطا بق نیب کے ذریعے ہونے والی کسی بھی انکوائری میں نیب اہلکاروں کی کوئی کمیشن نہیں ہوتی تمام ریکوری متاثرین میں تقسیم کی جاتی ہے پلی بارگین میں لوٹی گئی رقم منافع سمیت وصول کی جاتی ہے کرپشن کا مرتکب اعتراف جرم پر سرکاری ملازم نوکری سے جاتا ہے جبکہ سیاستدان 10 برس کےلئے اہم سرکاری عہدوں سے دو ر ہوجاتا ہے۔ نیب میں بھی خرابیوں کی نشاندہی پر ایکشن لیا جاتا ہے خواہش ہے کہ کاش ہم خود احتسابی شروع کردیں اور ایک اچھی قوم بن کر ابھریں۔