قاہرہ (نیوز ڈیسک) مصری صدر کو فروخت کیلئے آن لائن ویب سائٹ پر پیش کر دیا گیا۔ خریدنے کے لئے گاہک میدان میں اتر آئے۔ تفصیلات کے مطابق فیلڈ مارشل عبدالفتاح السیسی کی طرف سے گزشتہ دنوں اس عزم کا اعادہ کیا گیا کہ اگر ملکی معیشت کو بہتر بنانے کیلئے انہیں خود کو بھی فروخت کرنا پڑا تو وہ گریز نہیں کریں گے۔ مصری صدر کی طرف سے یہ اعلان ترقیاتی منصوبوں کو پیش کرتے ہوئے کیا گیا جس میں ان کا کہنا تھا کہ اگر میرے فروخت ہونے سے کچھ بہتری آتی ہے تو میں خود کو بیچ دوں گا جبکہ مصری عوام بھی پبلک فنڈز میں عطیہ دیں۔ان کے اس اعلان کے فوری بعد ایک تفریحی پیج پر انہیں فروخت کیلئے پیش کیا گیا۔ صارف کی طرف سے السیسی کی تصویر کے ’’معمولی استعمال شدہ فیلڈ مارشل‘‘ کے نام سے اشتہار جاری کیا گیا جس کے بعد مصری صدر کو خریدنے کے لئے ایک لاکھ ڈالرز سے زائد کی پیشکش بھی آ گئی۔