اسلام آباد(نیوز ڈیسک)وزیر خزانہ محمد اسحاق ڈار نے پاکستان اسٹاک ایکسچینج (پی ایس ایکس)میں شیئرز کی منتقلی کے عمل کے جلد تکمیل کی ضرورت پر زور دیا ہے۔سیکیورٹیز اینڈ ایکسچینج کمیشن آف پاکستان کے اعلیٰ حکام کے ایک اجلاس کی صدارت کرتے ہوئے وفاقی وزیرنے پی ایس ایکس میں گورننس کی بہتری پر بھی زور دیا۔ وفاقی وزیر کو پی ایس ایکس کی کارکردگی کے حوالے سے بریفننگ دی گئی۔ انہوں نے کہاکہ اسٹاک ایکسچینج کے ادغام کے بعد حصص کی نجکاری کا عمل تیز کرنے کی ضرورت ہے تاکہ نئی اسٹاک ایکسچینج کے بنیادی ڈھانچے کو بہتر بنایا جا سکے۔ انہوں نے کہا کہ اسٹاک ایکسچینج ادغام جدید طرز پر کیاگیاہے تاکہ اس کو بین الاقوامی معیار کی جدید اسٹاک ایکسچینج بنایا جا سکے۔ ایس ای سی پی کے چیئرمین نے اصلاحات کے ایجنڈے پر بریفننگ دی۔انہوں نے کہا کہ پاکستان بنیادی طور پر ایک زرعی ملک ہے اور ملک میں حقیقی معیشت کے رابطوں کو مزید بہتر بنایا جائیگا۔ انہوں نے کہا کہ پاکستان مرکنٹائل ایکسچینج قومی سطح کا نیٹ ورک ہوگا۔وزیر خزانہ نے ایس ای سی پی کے وڑن کی حمایت کرتے ہوئے مکمل تعاون کا یقین دلایا۔ انہوں نے کہا کہ حکومت اسٹاک اور بالخصوص سکوک کی مارکیٹ میں تعاون کیلیے پر عزم ہے۔ اجلاس کے دوران وفاقی وزیر کو این بی ایف سی کانفرنس کے حوالے سے بھی بریفننگ دی گئی۔ انہوں نے ایس ای سی پی کے معاون کردار، مختلف اصلاحات اور سرمایہ کاروں کی تعلیم و تربیت اور آگہی کی کاوشوں کو سراہا۔