لاہور(نیوز ڈیسک) پنجاب اسمبلی کے رکن و ترجمان پنجاب حکومت سیدزعیم حسین قادری نے کہا ہے کہ عمران خان سمیت مخالفین اورنج لائن میٹروٹرین فوبیا کا شکار ہو چکے ہیں۔ عمران خان اور دیگر کو پنجاب کے میگاپراجیکٹ کی تکمیل سے اپنا سیاسی مستقبل تاریک ہوتا دکھائی دے رہا ہے۔ سیدزعیم حسین قادری نے عمران خان اور دیگر کے بیانات پر تبصرہ کرتے ہوئے کہا کہ میگاپراجیکٹ بنانے کے لئے کسی صوبے کے لئے کوئی رکاوٹ نہیں۔ تحریک انصاف کے رہنما اپنی نااہلی کو چھپانے کے لئے پنجاب کے ترقیاتی منصوبوں کو ہدف تنقید بنا رہے ہیں۔ عمران خان جتنا وقت دوسروں پر تنقید میں صرف کرتے ہیں اگر خیبرپختونخوا کو اتنا ہی وقت دیں تو وہاں کے عوام کی محرومیاں دور ہو جائیں ۔قبل ازیں سیدزعیم حسین قادری نے پرویزالٰہی کے بیان پر تبصرہ کرتے ہوئے کہا کہ پرویزالٰہی پی آئی اے کے معاملے پر اپنی ڈفلی بجانا چھوڑ دیں۔ چوہدری برادران کے دور حکومت میں ترقیاتی منصوبے صرف کاغذوں میں بنتے تھے۔ چوہدری پرویزالٰہی لاہور کے عوام کی فلاح و بہبود کے لئے بنائے جانے والے منصوبوں کی مخالفت کم ظرفی کا ثبوت دے رہے ہیں۔ انہوں نے کہا کہ چوہدری برادران کے دورحکومت کے برعکس مسلم لیگ(ن) کی حکومت عوامی خدمت کے عملی اقدامات کے ذریعے میگاپراجیکٹس کو پایہ تکمیل تک پہنچا رہی ہے۔ مسلم لیگ(ن) کی حکومت عوامی خدمت کے ایجنڈے پرعمل پیرا رہے گی۔‎