اسلام آباد( نیوز ڈیسک) پی آئی اے کے مسئلے پر متحدہ حزب اختلاف سرگرم ہوگئی۔ چیئرمین سینٹ میاں رضا ربانی نے متحدہ حزب اختلاف کی ریکوزیشن پر بدھ (10 فروری) کو سینٹ کا ہنگامی اجلاس طلب کرلیاہے۔ سینٹ اجلاس شام 3 بجے پارلیمنٹ ہاﺅس میں ہوگا۔جنگ رپورٹر طاہر خلیل کے مطابق جس کےلئے ہفتے کو باضابطہ نوٹس جاری کردیاگیا ہے۔ پاکستان پیپلز پارٹی ، مسلم لیگ (ق)، ایم کیوایم، تحریک انصاف، جماعت اسلامی، اے این پی سمیت متحدہ اپوزیشن کے 33 اراکین نے پی آئی اے میں ہڑتال ملازمین پر تشدد اور حکومت کے غیر لچکدار رویے کے خلاف بطور احتجاج سینٹ کااجلاس ریکوزیشن کیا ہے۔ اجلاس 2 روز جاری رہنے کا امکان ہے۔ پی آئی اے میں لازمی سروسز قانون کے نفاذ، گیس کی قیمتوں میں ممکنہ اضافے اور عالمی مارکیٹ میں پٹرولیم نرخوں میں کمی کے باوجود پاکستان میں پٹرولیم مصنوعات پر حالیہ دونئے ٹیکسوں کے نفاذ پر بھی سینٹ میں بحث کی جائے گی۔