جدہ ( نیوز ڈیسک) پاکستانی وزیراعظم محمد نواز شریف کا دورہ سعودی عرب دونوں ملکوں کے تعلقات کی تقویت اور استحکام کا باعث بنا۔ سعودی کابینہ نے پاکستانی وزیراعظم کے دورہ مملکت پر مسرت کا اظہار کرتے ہوئے کہا کہ اس کی بدولت پاکستان اور سعودی عرب کے برادرانہ تعلقات کی توثیق ہوئی۔ انہوں نے چینی صدر کے ہمراہ اپنے مذاکرات کو انتہائی اہم قرار دیتے ہوئے کہا کہ دونوں ملک خطے اور دنیا بھر میں امن و استحکام کیلئے کوشاں تھے، ہیں اور رہیں گے ، جبکہ دونوں اس بات کو ضروری سمجھتے ہیں کہ دنیا کو درپیش چیلنجوں سے نمٹنے کے لئے عالمی برادری کو مل جل کر جدوجہد کرنا ہوگی۔ شاہ سلمان نے چین کے ساتھ چودہ معاہدوں کو سیاسی، اقتصادی، تجارتی، ثقافتی، عسکری، سلامتی اور توانائی کے شعبوں میں گہرے تعاون کو مزید مضبوط بنانے کے عزم کا آئینہ دار قرار دیا۔ انہوں نے اس حوالے سے یہ بھی کہا کہ دونوں ملکوں کے تعلقات علاقائی بین الاقوامی سطوں پر مؤثر ثابت ہوں گے، سعودی کابینہ نے افغانستان کے دارالحکومت کابل میں بھی دہشتگردانہ حملوں کی مذمت کی، کابینہ نے زرعی اراضی کی چک بندی اور اس کے ضوابط کی منظوری دی۔ وزیر دفاع کو ملائیشیا کے ساتھ سائنسی تکنیکی و صنعتی تعاون کے معاہدے کا اختیار تفویض کیا۔ کابینہ نے زرعی منصوبوں میں شراکت سے متعلق سوڈان کے ساتھ معاہدے کی توثیق کردی۔