ریاض(نیوزڈیسک)سعودی عرب اور ایران میں کشیدگی تاحال برقرارہے،ایران کا سفارتی عملہ سعودی عرب سے نکل گیا ہے جبکہ تہران چھوڑنے والے سعودی سفارتکار بھی ریاض پہنچ گئے ہیں۔ادھر سعودی عرب اور ایران میں حالیہ کشیدگی کے خاتمے اور شام امن مذاکرات یقینی بنانے کے لیے اقوام متحدہ اور امریکا سرگرم ہیں۔سعودی عرب کی سرکاری نیوز ایجنسی کے مطابق شام کے لیے اقوام متحدہ کے خصوصی نمائندے نے ریاض میں سعودی وزیر خارجہ عادل الجبیر سے ملاقات کی۔سعودی وزیر خارجہ نے یقین دہانی کرائی کہ ان کا ملک بین الاقوامی برادری کے ساتھ مل کر شام کے بحران کا حل تلاش کرنے کی کوشش جاری رکھے گا۔ دوسری جانب سفارتخانہ جلائے جانے کے بعد تہران چھوڑنے والے سعودی سفارتکار وطن واپس پہنچ گئے،شہزادہ خالدبن سعود اور وزارت خارجہ کےحکام نے عملے کا استقبال کیا۔ریاض میں موجود ایرانی سفارتی عملے نے بھی سعودی عرب چھوڑ دیا ہے۔