نئی دہلی(نیوزڈیسک)بھارتی وزیردفاع منوہرپاریکر نے اعتراف کیا ہے کہ پٹھان کوٹ میں فضائیہ کے اڈے پرہونیوالے حملے میں بعض خامیاں سامنے آئی ہیں اور کہاہے کہ تمام چھ دہشتگردوں کوہلاک کردیاگیا ہے جو پاکستان ساختہ ہتھیاراستعمال کررہے تھے۔فضائی اڈے کے دورے کے بعدپریس کانفرنس سے خطاب کرتے ہوئے کہاکہ 36گھنٹوں تک جاری رہنے والے آپریشن کے دوران دہشتگردوں کاخاتمہ کردیاگیاتھا تاہم چھان بین اب بھی جاری ہے۔ایک سوال کے جواب میں انہوں نے کہاکہ ہماری اطلاعات کے مطابق اب کوئی دہشتگردموجود نہیں تاہم ہم تلاش کی کارروائی مکمل ہونے کاانتظار کرینگے جو بدھ کو مکمل ہونے کی توقع ہے ۔ انہوں نے کہاکہ اس کارروائی کے دوران ہلاک ہونیوالے سات سیکیورٹی اہلکاروں کوشہید کادرجہ دیاجائیگا اورانہیں وہی مراعات دی جائیں گی جو جنگ کے دوران شہید ہونیوالوں کو دی جاتی ہیں۔ انہوں نے کہاکہ دہشتگردوں کیخلاف چالیس سے پچاس کلوگرام بارودی مواد اورمارٹر گولے موجود تھے جو وہ انڈربیرل گرنیڈلانچر سے چلاتے رہے۔ ایک اور سوال کے جواب میں انہوں نے کہاکہ بعض نقائص سامنے آئے ہیں تاہم سیکیورٹی پر کوئی سمجھوتہ نہیں کیاجائیگا دہشتگردوں کااڈے میں آناتشویشناک ہے یہ اڈا2000ایکڑ پرپھیلاہواہے ۔ایک اور سوال کے جواب میں انہوں نے کہاکہ دہشتگردوں سے ملنے والابعض اسلحہ پاکستان ساختہ ہے ۔