سرینگر(نیوزڈیسک)…مقبوضہ جموں کشمیر کے کٹھ پتلی وزیراعلیٰ مفتی محمد سعید نے کہاہے کہ پٹھان کوٹ ایئر بیس پر حملے کا مقصد پاک بھارت مذاکرات کو سبو تاژ کرناہے ۔ان خیالات کا اظہار انہوں نے ایمز ہسپتال نئی دہلی میں میڈیا سے گفتگو کرتے ہوئے کیا ۔ انہوں نے کہاکہ پٹھان کوٹ ایئر بیس حملے کا مقصد پاک بھارت مذاکراتی عمل کو سبو تاژ کرناہے ۔دشمن اور شر پسند عناصر نہیں چاہتے کہ پاکستان اور بھارت کے تعلقات خوشگوار ہوں ۔خیال رہے کہ بھارتی پنجاب کے پٹھان کوٹ میں بھارتی فضائیہ کی ایئر بیس پر نامعلوم افراد نے شب ساڑھے تین بجے حملہ کیا تھا جس کے نتیجے میں بھارتی فوج کے ایک کرنل سمیت 6اہلکار ہلاک جبکہ جوابی کارروائی میں 3حملہ آور بھی مارے گئے تھے ۔واضح رہے مفتی سعید کو دس روز قبل نمونیا اور جسم سے بدبو اور پیپ پڑنے کے باعث نئی دہلی کے ایمز ہسپتال منتقل کردیاگیاہے جہاں ڈاکٹروں کی رپورٹ کے مطابق ان کی حالت تشویشناک ہے