نئی دہلی(نیوزڈیسک)ماضی کی روایات توڑتے ہوئے بھارت کی حکمراں جماعت بھارتیہ جنتاپارٹی نے دوٹوک انداز میں کہاہے کہ ایک حملہ سے پاک بھارت تعلقات کی بحالی کاعمل ختم نہیں کیاجاسکتا۔بھارتیہ جنتاپارٹی کے سیکریٹری شری کانت شرما نے کہاہے کہ حکومت درست وقت پردرست فیصلہ کریگی۔بھارتی اخبارکے مطابق پٹھان کوٹ ائربیس پرحملے سے متعلق شری کانت شرما کاکہناہے کہ بھارت دہشتگردی کی ایسی کارروائیوں کاموثرجواب دیناجانتاہے،ساتھ ہی یہ بھی واضح کیا کہ ایک حملے سے پاک بھارت تعلقات کی بحالی کاعمل ختم نہیں کیاجاسکتا۔بھارت کے وزیرماحولیات پرکاش جوادکرنے بھی واضح کیا کہ پٹھان کوٹ حملے سے ڈائیلاگ کاعمل تباہ نہیں ہوسکتا،پڑوسی نہیں بدلے جاسکتے،مذاکرات کاعمل جاری رہناچاہیے۔پرکاش جوادکر کاکہناتھاکہ مذاکرات کامرکزی نکتہ دہشتگردی ہوناچاہیے اوریہی بھارت کررہاہے۔حکومت پاکستان سمیت تمام ہمسایوں سے بہتر تعلقات چاہتی ہے مگر دہشتگردی کو کسی صورت برداشت نہیں کیا جائے گا، فورسز نے دہشتگردوں کو بھرپور جواب دیا اور آئندہ بھی دہشتگردی کا پوری جرات کے ساتھ مقابلہ کیاجائے گا۔ بی جے پی کے سیکرٹری جنرل نے کہا کہ ابھی یہ بھی دیکھنا ہوگا کہ پاکستان اس حملے کے متعلق کا طرزعمل اختیار کرتا ہے اور مستقبل کے تعلقات کا انحصار بھی اسی بنیاد پر ہوگا۔