نئی دہلی(نیوزڈیسک) بھارتی وزیر مملکت ڈ اکٹر جتندر سنگھ نے کہا ہے کہ پٹھان کوٹ حملہ کے ذمہ دار وہ عناصرہیں جو پاکستان اور بھارت کے درمیان امن نہیں چاہتے تاہم امن مذاکرات کی اپنی طاقت ہے اور ہمارے سیکورٹی ادارے ہر طرح کی صورتحال سے نمٹنے کی صلاحیت رکھتے ہیں جبکہ دوسری جانب بڑی اپوزیشن جماعت کانگریس نے یہ معاملہ پاکستان سے اٹھانے کا مطالبہ کیا ہے۔بھارتی میڈیا کے مطابق مقبوضہ کشمیر میں ایک پروگرام کے دوران میڈیا سے گفتگو کرتے ہوئے وزیر مملکت برائے وزیراعظم دفتر ڈاکٹر جتیندر سنگھ نے پٹھان کوٹ میں فضائیہ کے اڈے پر دہشت گردانہ حملے کے حوالے سے ایک سوال کے جواب میں کہاکہ فوج اور نیم فوجی دستے سمیت تمام سیکورٹی ایجنسیوں نے اس واقعہ کا نوٹس لیا ہے اور اس سے نمٹنے میں وہ فعال ہیں۔دہشت گردانہ حملے کے باوجود پاکستان سے مذاکرات کا عمل جاری رہنے کے معاملے پر انہوں نے کہا کہ جو عناصر دونوں ممالک کے درمیان امن کی بحالی نہیں چاہتے وہ اس طرح کی حرکتیں کرتے رہتے ہیں لیکن امن مذاکرات کے عمل کی اپنی طاقت ہے۔پاکستان کے ساتھ مذاکرات جاری رہنے کے حوالے سے ایک سوال کے جواب میں ڈ اکٹر جتندر سنگھ نے کہاکہ پٹھان کوٹ ائیربیس پر حملے کے بعد پاکستان کے ساتھ مذاکرات جاری رہنے چاہیں یا نہیں اس بات کا فیصلہ وزارت خارجہ اور داخلہ کو کرنا ہے۔ ڈ اکٹر جتیندر سنگھ نے کہاکہ ملک کی سیکورٹی ایجنسیاں ہر طرح کی صورتحال سے نمٹنے کی بھرپور صلاحیت رکھتی ہیں۔دوسری جانب کانگریس نے پٹھان کوٹ ائیربیس پر دہشت گرد حملے پر گہری تشویش کا اظہار کرتے ہوئے وزیر اعظم نریندر مودی سے اس معاملے کو پاکستان کے سامنے اٹھانے کا مطالبہ کردیا۔بھارتی میڈیا کے مطابق کانگریس کے مواصلاتی شعبے کے سربراہ رندیپ سنگھ سرجیوالا نے میڈیا سے گفتگو کرتے ہوئے کہا کہ یہ المناک صورتحال ہے کہ پاکستان کے ساتھ امن کی کوشش کے درمیان اس طرح کے واقعات ہو رہے ہیں۔دہشت گرد فوج کی وردی میں مسلسل حملے کر رہے ہیں۔رندیپ سنگھ سرجیوالا نے کہاکہ مودی پٹھان کوٹ حملے کے معاملے کو پاکستان کے سامنے اٹھائیں۔ کانگریس کے ایک اور رہنما اشوانی کمار نے پاکستان پر الزام عائد کرتے ہوئے کہا ہے کہ بھارتی وزیراعظم نریندرا مودی پاکستان گئے اور وہاں حکمران جماعت سے دوستی کا ہاتھ بڑھایا لیکن ہمیں واپسی پر کیا حاصل ہوا ، جموں و کشمیر میں پیپلز ڈیموکریٹک پارٹی (پی جے پی ) کے اتحادی جماعت کے رہنما وحید الرحمان پارا نے کہا ہے کہ پاکستان میں کچھ عناصر پاک بھارت امن مذاکرات میں خلل پیدا کرنا چاہتے ہیں ،انہوں نے کہا کہ اس خاص دہشت ناک حرکت کا مطلب ہے کہ پاکستان کے ساتھ تعلقات خراب کرنا اور دونوں ممالک کے درمیان امن مذاکرات کو شکست دینا ہے۔
Back to Conversion Tool