نئی دہلی (نیوزڈیسک) پاکستان اورقطرمیں ابھی تک ایل این جی معاہدہ پائپ لائن میں ہے لیکن بھارت میں گیس درآمد کرنے والی سب سے بڑی کمپنی پیٹرونیٹ نے اعلان کیا ہے ہے وہ قطر کی راس گیس سے اصل قیمت کے تقریباً آدھے نرخ پر لیکوئیفائیڈ نیچرل گیس (ایل این جی) خریدے گی۔ وزیر پٹرولیم دھرمیندر پردھان نے صحافیوں سے بات چیت کرتے ہوئے بتایا کہ کم نرخوں پر گیس کی خریداری سے ملک کو چالیس ارب روپے (604.69 ملین ڈالرز) کی بچت ہوگی۔ گزشتہ ماہ رائٹرز نے بتایا تھا کہ دونوں ملکوں کے درمیان گیس کی منتقلی کے اخراجات میں کمی لانے اور طے شدہ گیس کے مقابلے میں کم گیس لینے کے جرمانے سے بچنے کیلئے بھارت اور قطر کے درمیان مذاکرات ہو رہے ہیں۔ نئی دہلی کا کہنا ہے کہ پیٹرونیٹ قطر کی راس گیس سے 6 سے 7 ڈالر فی ملین برٹش تھرمل یونٹس کے نرخ پر گیس حاصل کرے گی۔ اس سے قبل دونوں ملکوں کے درمیان 12 سے 13 ڈالر فی ملین برٹش تھرمل یونٹس کے ٹیرف پر اتفاق ہوا تھا۔