کینبرا(نیوزڈیسک)آسٹریلیا نے کہاہے کہ عراق اور شام میں خود ساختہ خلافت قائم کرنے والی دہشت گرد تنظیم ’اسلامک اسٹیٹ‘ انڈونیشیا پر نگاہیں جمائے ہوئے ہے۔امریکی میڈیاکے مطابق منگل کوان خیالات کا اظہار آسٹریلوی اٹارنی جنرل نے آسٹریلیا اور انڈونیشیا کے وزراء ، پولیس سربراہان اور دوسرے اعلیٰ سکیورٹی حکام کی میٹنگ میں کیا، ایک بیان میں آسٹریلیا کے اٹارنی جنرل جورج برانڈس نے کہاکہ دنیا کے سب سے بڑی مسلمان آبادی کے حامل ملک میں خلافت کے قیام کے خواب کو حقیقت میں تبدیل کرنے کے لیے عسکریت پسند تنظیم خفیہ کوششوں کا سلسلہ جاری رکھے ہوئے ہے۔ برانڈس نے کہاکہ اِس تناظر میں یہ آسٹریلیا اور دوسرے ممالک کے مفادات کے لیے ایک بڑی وارننگ ہے۔