نئی دلی ّ(نیوزڈیسک) شدت پسند تنظیم داعش سے تیل کون خریدتا ہے اور اس تنظیم کا تیل بیچنے کے لئے دلالی کون کرتا ہے؟ یہ سوال بہت اہمیت کا حامل ہے کیونکہ داعش کا تیل خریدنے اور اس کی دلالی کرنے والوں کو والوں کو اس تنظیم کے ساتھی اور حمایتی قرار دیا جاتا ہے۔ ایک طرف تو روس نے ترک صدر طیب اردوان پر داعش سے تعلقات کا الزام لگایا تو دوسری طرف ترک حکام نے تیل کے کاروبار سے تعلق رکھنے والی کئی روسی شخصیات کے نام بتادئیے کہ وہ داعش سے بھی تعلقات رکھتے ہیں۔ ادھر دنیا اس تنازعے میں الجھی ہوئی تھی تو دوسری طرف بھارت کی سرکاری تیل کمپنی انڈین آئل کارپوریشن کے مارکیٹنگ منیجر کو داعش کے ساتھ تعلقات کے الزام میں خود بھارتی ایجنسیوں نے ہی گرفتار کرلیا ہے۔نیوز سائٹ dnaindiaکے مطابق محمد سراج الدین کو سپیشل آپریشن گروپ اور راجستھان پولیس نے جے پور شہر سے گرفتار کیا۔ بھارتی حکام کے مطابق ملزم پر داعش کی مدد، اس کے ساتھ تعلقات اور بھارت میں اس کے عزائم کو فروغ دینے اور اس کے لئے لوگ بھرتی کرنے کے الزامات بھی ہیں۔ ملزم کے قبضے میں سے داعش کے کئی میگزین اور ویڈیوز بھی برآمد ہوئی ہیں جبکہ اس کے سوشل میڈیا اکاﺅنٹس کے متعلق بھی مزید تحقیقات کی جارہی ہیں، جن سے کچھ قابل اعتراض مواد پہلے ہی برآمد کیا جاچکا ہے