اسلام آباد(نیوز ڈیسک) اسلام آباد میں سیاسی کشیدگی کم کرنے اور معاملات مذاکرات کے ذریعے طے کرنے کے لیے حکومت اور اپوزیشن کے نمائندوں کے درمیان ملاقات کا آغاز ہوگیا۔
حکومت اور اپوزیشن کے وفود اسپیکر قومی اسمبلی کے چیمبر میں موجود ہیں، جہاں اسپیکر سردار ایاز صادق نے اپوزیشن ارکان کا استقبال کیا۔ اپوزیشن وفد میں علامہ راجا ناصر عباس، بیرسٹر گوہر، اسد قیصر، عامر ڈوگر اور سلمان اکرم راجا شریک ہیں۔حکومتی وفد میں وزیر داخلہ محسن نقوی، شیری رحمان، ڈاکٹر طارق فضل چوہدری، طلال چوہدری، اعجاز جاکھرانی، نوید قمر، رانا ثناء اللہ اور امیر مقام شامل ہیں۔ذرائع کے مطابق اجلاس کے دوران خیبر پختونخوا کی مجموعی صورتحال سمیت دیگر سیاسی امور پر تبادلہ خیال کیا جائے گا، جبکہ لانگ مارچ کو مؤخر کرنے کے معاملے پر بھی بات چیت متوقع ہے۔وفاقی وزیر برائے پارلیمانی امور ڈاکٹر طارق فضل چوہدری نے جیو نیوز سے گفتگو میں کہا کہ مذاکرات کا آغاز ابھی ہوا ہے اور دونوں فریق اس بات پر متفق ہیں کہ آج کسی نتیجے تک پہنچنے کی کوشش کی جائے گی۔ انہوں نے کہا کہ مزید تفصیلات کے لیے فی الحال انتظار کرنا ہوگا۔سلمان اکرم راجا نے کہا کہ اپوزیشن مذاکرات میں انصاف کے معاملے کو اٹھائے گی۔
ان کے مطابق پی ٹی آئی قیادت سے ملاقات اور مشاورت ضروری ہے، اگر یہ ملاقات ہوجاتی ہے تو بات آگے بڑھ سکتی ہے، بصورت دیگر صورتحال برقرار رہے گی۔ انہوں نے بانی پی ٹی آئی کی رہائی اور انصاف کی فراہمی کا مطالبہ بھی کیا۔اسد قیصر کا کہنا تھا کہ بانی پی ٹی آئی سے ملاقات کا مقصد ان سے مشاورت کرکے آئندہ کا ایجنڈا طے کرنا ہے۔ ان کے مطابق عمران خان کی بہنوں سے متعلق معاملہ بھی زیر بحث آئے گا، تاہم ان کے لیے سب سے اہم بانی پی ٹی آئی سے ملاقات ہے۔عامر ڈوگر نے کہا کہ وہ ابتدا ہی سے مذاکرات اور ملاقات کے حامی رہے ہیں۔ ان کا کہنا تھا کہ سیاسی اختلافات کو محاذ آرائی میں تبدیل نہیں ہونا چاہیے اور وہ کسی ادارے کے ساتھ تصادم یا لڑائی نہیں چاہتے۔علامہ راجا ناصر عباس نے کہا کہ بانی پی ٹی آئی عمران خان سے محمود اچکزئی کی ملاقات کا معاملہ بھی مذاکرات میں اٹھایا جائے گا۔ ان کے مطابق بانی پی ٹی آئی سے ملاقات کے بغیر مسائل کا حل ممکن نہیں، جبکہ مذاکرات کے حوالے سے بعض شرائط طے کرنا بھی ضروری ہے۔ ان کا کہنا تھا کہ موجودہ معاملات کے حل کا آسان راستہ بانی پی ٹی آئی سے ملاقات ہے۔
