اسلام آباد(نیوز ڈیسک)لاہور ایئرپورٹ پر سکیورٹی اور دستاویزات کی جانچ کے دوران جعلی ٹکٹ پر انٹرنیشنل ڈپارچر ایریا تک پہنچنے والے مسافر کو گرفتار کرلیا گیا۔
ذرائع کے مطابق گزشتہ ایک ماہ کے دوران لاہور ایئرپورٹ پر بغیر دستاویزات یا جعلی کاغذات کے ذریعے داخلے کی یہ تیسری کوشش سامنے آئی ہے۔ حالیہ واقعے میں بھی ایک شخص انٹرنیشنل ڈپارچر ایریا تک پہنچنے میں کامیاب ہوگیا۔ذرائع کا کہنا ہے کہ اوکاڑہ سے تعلق رکھنے والا شیراز نذیر ولد شیخ نذیر جعلی ٹکٹ کے ذریعے ایئرپورٹ کے انٹرنیشنل ڈپارچر ایریا میں داخل ہوا تھا۔کاؤنٹر پر پہنچنے کے بعد اہلکاروں نے مسافر کے کاغذات کی جانچ کی تو اس کے پاس موجود ٹکٹ جعلی ثابت ہوا، جس پر اسے حراست میں لے لیا گیا۔ایف آئی اے حکام نے ابتدائی کارروائی کے بعد مسافر کو مزید تفتیش کے لیے ایئرپورٹ سکیورٹی فورس (اے ایس ایف) کے حوالے کردیا۔ اے ایس ایف نے اسے کنٹرول روم منتقل کرکے پوچھ گچھ کی۔تفتیش مکمل ہونے پر مسافر کو مزید قانونی کارروائی کے لیے پولیس کے سپرد کردیا گیا، جبکہ حکام کے مطابق شیراز نذیر کا پاسپورٹ بھی جنوری 2025 میں ایکسپائر ہوچکا تھا۔
