نئی دہلی (آئی این پی) دہلی پولیس کے سابق کمشنر نیراج کمار نے کہا ہے کہ انڈر ورلڈ ڈان دائود ابراہیم کو واپس لانا اتنا آسان نہیںکیونکہ وہ پاکستان کی حفاظت میں ہے۔ ہفتہ کو بھارتی میڈیا کے مطابق دہلی پولیس کے سابق کمشنر کاکہنا ہے کہ دائود ابراہیم کو واپس لانا اتنا آسان کام نہیں وہ دشمن ملک کی حفاظت میں ہے ، حال ہی میں گرفتار ہونے والے گینگسٹر چھوٹا راجن سے بھی دائود ابراہیم کی گرفتاری میں زیادہ مدد نہیں مل سکتی، دائود ابراہیم پاکستان کی خفیہ ایجنسیوں کی حفاظت میں ہے۔ نیراج کمار نے کہاکہ بھارتی حکومت کو چاہیے کہ وہ دائود ابراہیم کو واپس لانے کیلئے ہر ممکن کوشش کرے، ایک دن ضرور آئے گا کہ جب حکومت اسے گرفتار کرنے میں کامیاب ہو گی۔ واضح رہے کہ بھارت الزام عائد کرتا ہے کہ انڈر ورلڈ ڈان دائود ابراہیم پاکستان میں چھپا ہوا ہے جبکہ پاکستان نے بھارتی اقدامات کی ہمیشہ سے تردید کی ہے اور کہا ہے کہ اگر دائود ابراہیم کی پاکستان میں موجودگی کے حوالے سے کسی کے پاس کوئی اطلاعات ہیں تو وہ ہم سے شیئر کریں۔