اسلام آباد (نیوز ڈیسک) لاہور کے علاقے سبزہ زار میں افسوسناک واقعہ پیش آیا ہے جہاں شوہر سے مبینہ جھگڑے کے بعد ایک خاتون پر اپنے نومولود بیٹے کو گندے نالے
میں پھینکنے کا الزام عائد کیا گیا ہے۔ پولیس نے کارروائی کرتے ہوئے ملزمہ کو گرفتار کرلیا۔
ڈی آئی جی آپریشنز کے ترجمان کے مطابق نومولود بچہ 26 روز قبل پیدا ہوا تھا، جسے مبینہ طور پر پلاسٹک کے شاپر میں ڈال کر نالے میں پھینکا گیا۔ اطلاع ملنے پر پولیس موقع پر پہنچی اور نالے سے بچے کی لاش برآمد کرلی۔
پولیس نے واقعے میں مبینہ طور پر ملوث خاتون شمسیلہ کو حراست میں لے کر اس کے خلاف مقدمہ درج کرلیا ہے۔ حکام کے مطابق مقدمے میں اقدام قتل کی دفعہ شامل کی گئی ہے۔
ترجمان کے مطابق پولیس نے نومولود کی لاش اپنی تحویل میں لے کر ضروری قانونی کارروائی شروع کردی ہے، جبکہ واقعے کے تمام پہلوؤں کا جائزہ لینے کے لیے مزید تفتیش انویسٹی گیشن پولیس کے حوالے کردی گئی ہے۔
پولیس حکام کا کہنا ہے کہ تحقیقات کے دوران واقعے کی اصل وجوہات اور دیگر حقائق سامنے لانے کی کوشش کی جا رہی ہے۔
