اسلام آباد(نیوز ڈ یسک) مشہور PUBG موبائل کانٹینٹ کریئیٹر فاروق احمد، جنہیں گیمنگ کی دنیا میں ’وائے ٹی‘ کے نام سے جانا جاتا تھا، کے انتقال کی خبر نے ان کے مداحوں اور

گیمنگ کمیونٹی کو افسردہ کردیا۔فاروق احمد کے قریبی دوستوں نے سوشل میڈیا کے ذریعے ان کے انتقال کی اطلاع دی۔ دوستوں کے مطابق گیمنگ کمیونٹی کے مقبول کریئیٹر فاروق احمد کینیڈا کے صوبے البرٹا کے شہر کیلگری میں پیش آنے والے ایک موٹر سائیکل حادثے میں جان کی بازی ہار گئے۔خبر سامنے آنے کے بعد PUBG موبائل سے وابستہ متعدد معروف شخصیات اور گیمنگ کریئیٹرز نے سوشل میڈیا پلیٹ فارمز پر فاروق احمد کو یاد کرتے ہوئے ان کے لیے تعزیتی پیغامات جاری کیے اور ان کی خدمات کو خراجِ عقیدت پیش کیا۔فاروق احمد نے PUBG موبائل سے متعلق ویڈیوز اور مختلف گیمنگ مواد کے ذریعے بڑی تعداد میں ناظرین اور مداح بنائے تھے۔

ان کے یوٹیوب چینل ’Farooq Ahmad YT‘ کو تقریباً 9 لاکھ 25 ہزار افراد سبسکرائب کرچکے تھے، جبکہ انسٹاگرام پر بھی ان کے قریب 85 ہزار فالوورز موجود تھے۔گیمنگ کے شوقین افراد میں فاروق احمد کی شہرت کی ایک بڑی وجہ ان کا نایاب اور قیمتی PUBG موبائل اکاؤنٹ بھی تھا۔ وہ اپنی ویڈیوز میں گیم کے مہنگے UC پیکیجز، نایاب اشیا، جدید ویپن اپ گریڈز اور وسیع کلیکشنز دکھاتے تھے۔ان کے کانٹینٹ میں ایک ایسی ویڈیو بھی شامل تھی جس میں انہوں نے ایک انتہائی قیمتی PUBG موبائل اکاؤنٹ پیش کیا تھا، جسے وہ دنیا کے مہنگے اور منفرد اکاؤنٹس میں شمار کرتے تھے۔ یہی نایاب کلیکشن ان کے گیمنگ کانٹینٹ کو دوسرے کریئیٹرز سے منفرد بناتا تھا۔تاہم فاروق احمد کے انتقال کی باضابطہ تصدیق تاحال ان کے اپنے سوشل میڈیا اکاؤنٹس سے سامنے نہیں آئی۔ اس کے باوجود ان کے دوستوں، مداحوں اور گیمنگ کمیونٹی سے تعلق رکھنے والے افراد کی جانب سے سوشل میڈیا پر تعزیتی پیغامات کا سلسلہ جاری ہے۔