اسلام آباد (نیوز ڈیسک) ہونڈا CD 70 کے صارفین کے لیے ایکسچینج پروگرام متعارف کرایا گیا ہے، جس کے تحت پرانی موٹر سائیکل کی قیمت نئی بائیک خریدتے وقت ایڈجسٹ کرائی جاسکتی ہے۔
دستیاب معلومات کے مطابق اس سہولت سے فائدہ اٹھانے کے لیے صارف کو اپنی پرانی موٹر سائیکل قریبی ایٹلس ہونڈا ڈیلرشپ پر لے جانا ہوگی۔ وہاں ماہرین بائیک کی حالت، ماڈل اور دیگر ضروری عوامل کا جائزہ لینے کے بعد اس کی ایکسچینج ویلیو طے کریں گے۔
ڈیلرشپ کی جانب سے مقرر کی جانے والی رقم نئی موٹر سائیکل کی قیمت میں سے منہا کردی جائے گی، جس کے بعد خریدار کو صرف باقی رقم ادا کرنا ہوگی۔ اس طریقہ کار سے صارف کو پہلے پرانی موٹر سائیکل فروخت کرنے اور پھر نئی بائیک خریدنے کی زحمت کم ہوسکتی ہے۔
تاہم پرانی CD 70 کے لیے کمپنی کی جانب سے کوئی یکساں یا مقررہ ایکسچینج قیمت سامنے نہیں آئی۔ ہر موٹر سائیکل کی قیمت اس کی حالت، ماڈل، استعمال اور دیگر متعلقہ عوامل کو دیکھتے ہوئے الگ مقرر کی جائے گی۔
دستیاب تفصیلات کے مطابق نئی Honda CD 70 کی قیمت 1 لاکھ 59 ہزار 900 روپے ہے۔ ایکسچینج کی صورت میں خریدار کو ادا کی جانے والی حتمی رقم کا انحصار پرانی موٹر سائیکل کی طے شدہ ویلیو پر ہوگا۔
ایکسچینج سہولت سے فائدہ اٹھانے کے خواہشمند صارفین کو مشورہ دیا گیا ہے کہ وہ ایٹلس ہونڈا کی متعلقہ ڈیلرشپ سے رابطہ کرکے اپنی بائیک کی قیمت، ضروری دستاویزات، شرائط اور دیگر قواعد کی مکمل معلومات حاصل کریں۔
